今日再去春天揀結婚衫

我今日去揀埋另外2件衫勒......

好在肥老闆見d男禮唔合心水，俾埋件時尚晚裝我，原來春天時尚款已經靚過舊年好多!!

今日去揀埋2件晚裝(1時尚 1 d design)......

依家4件晚裝都唔同色系，上身唔同design,......好好彩!!!

(我銀、黑、灰、藍、白、粉紅、綠都唔揀得喎)
因為有一件係時尚款(我無upgrade亦唔想upgrade),好難揀呀......

依家我有﹕
1.50%啡、20%黃、30%綠，釘啡、金、紅珠仔，真絲直身小拖尾背心露背晚裝(買走)
2.大紅色、單肩、背透視及繡紅/綠花，拖啡金lace尾，直身絲料中國look晚裝(租)
3.湖水藍色、車紫色lace花、珠及花邊、一字膊層層a字拖尾晚裝(租)
4.橙金色、v型幼帶掛頸、鑲大串金色珠鍊及金珠花、直身晚裝(租)

5.褂皇(全件密繡銀線為主、鑲金龍鳳)
6.low cut大拖尾閃金水晶bell cut婚紗

另外，肥老闆想我著埋﹕
紅底車金線布料平腳bell cut 宮廷衫(買)

都要諗下d衫點分配......

試製婚咭

因為印製喜帖時不敢把自己的樣子貼上去，可是又很渴望有自己頭像的婚咭，只好嘗試自己動手做。

公司maymay很好，讓我安裝了軟件，前後教了我兩次，我都失敗而回。

今天回來再試，悶悶不樂，於是再試。

今次揀選了一幅白邊的相片，把影像弄得很光、色淡了，再試在上面打字，最後加上相框了事。

本來還想把頭像剪出來，接在自然的景色中，但依然失敗!!!

革命尚未成功，仍需努力。

不過今天這個製成品已經可以拿出去晒相，變成婚咭了。

yeah!!!!

好鬼勞氣!!!!

唔知做乜,呢排好易唔開心......
今日我媽咪call我話要今日去試件衫,咁我叫佢係公司附近等我。
咁我放工去到，佢面口唔好睇.
唔知係咪嫌我遲左放工,要佢等.

去到間舖度拎旗袍,佢都唔覺有乜問題.
係我見到件衫個底色車錯左......
咁我同老闆講.
老闆話可以盡快造另一件,叫我媽咪試左身先.

我媽好嬲,叉起腰,一味話要退訂.
老闆都無爭辯,就拎返訂俾我地。
其實我覺得唔駛攪成咁......我又覺得自己好瘀皮。

出到去街,我媽話要我將個租衫package其中一件俾佢租多件衫.
本來果度,680租2件,我租左一件俾佢,另一件俾新郎哥架嘛.
咁點攪即...明明我預左佢訂造,有乜理由要拎多我一件衫喎.
咁我話唔得,佢話叫我俾多680佢租2件。咁邊恕著得晒呀???
佢話要2件係我結婚佢著,另一件等佢去表演著!!!
咁租衫梗係同一日租啦,唔通人地俾你一時拎一件咩??

我媽話佢朋友又話返大陸造好過又呢又路,
大佬,我一早叫左佢反正成日返大陸玩,去造衫好平.
佢果時猛話唔識去邊度造,叫我陪佢.
咁我邊有時間呢???咁咪只好搵間我識人造過的香港店舖啦......
依家佢又話對間舖無信心又呢又路......
佢又發悔氣話咁朝早我出門佢求其著套裝就得,我真係把幾火!!!!
邊有人個女出門佢去著套返工套裝???

我實在無時間再同佢玩,我同佢講咁我幫佢唔到,你自己鍾意點就點.
佢又話要去租衫果間到睇,人地會有新貨.
咁今日我都唔知佢突然話出城,我都無帶張單!!!咁點去睇款呀???
真係好鬼嬲!!!

之前訂造時又係佢嫌絲絨料唔夠靚,改單要用珠片lace.要貴左我都算勒!!!
改左單,有誤會,變左個底布顏色,人地都幫佢諗方法.佢就一野叫退訂.
我d衫明明計劃好要邊件俾邊個,佢又黎打亂我計劃!!!

佢都唔係第一次,之前明明話聖安娜餅咭好,等我買左百幾張.
跟住呢幾個月又話佢d朋友話聖安娜cheap,要我再買幾十張美心佢俾朋友.

$$係一個問題,但唔係最令我嬲.我最嬲係,成日乜都要我理,佢幫唔到我不特止,
仲成日變黎變去,打亂我陣腳.
又要怨我唔做呢野果樣,
前排買左嫁妝d被,放左係我男友度,佢又怪我仲唔叫男友車返去女家!!!
好似今日又話細佬話我好唔同老豆造西裝，但語氣中明明係佢自己怨我。我後來打俾細佬,原來細佬只係話佢自己要幫老豆去買西裝!!!


大佬,我6月結婚,天時暑熱,咁早買咪盞買冬天料??未得黎熱過咩??
再講,咁大個人點解乜都要我去買???點解乜都怪我做得唔夠好???


好鬼嬲呀!!!

都唔知係我小器定係佢真麻煩。
我d同事就話我太遷就我阿媽.....今日我真係好想喊!!!

我未來老公又已經無乜時間理結婚野.......我感到好似乜都要我去做,但有乜唔好又個個怪我咁!!!!

今日終於去帖舖起稿、傾場地佈置、掃描相底

非常快手，一氣呵成。

午飯時過恒山選帖、起文字稿。一群女同事陪伴我，證明我們揀的帖也不差。

可惜，未能揀定款式，勁call肥佬闆，半小時也打不通電話，佢又同人講車唔收線。

其實只係想問佢要印金色定紅色。

結果帖舖的人，好好心咁叫我借款走。

哈哈!!

放工，先去旺角放下過百張底片scan。然後行過太子金都，找化妝師。

再上去傾場地佈置，又揀花球。夢花舍的joey超好人!!!!!!

然後再走下場，去yan屋企，食飯、睇台灣蝴蝶樹的相、睇agnes的蒙羅麗沙mtv，仲有睇yan婚禮及片頭的music video.好鬼死感動!!!

再食佢親手整的lemon pie/ 雲石蛋糕。好美味呀!!

本來我係去學整cake,點知變左睇婚禮......

攪到十二點都未沖涼......

嘻嘻!!

尋日婚紗展.......

我地去補買美心餅咭、訂埋紅酒、買埋羽毛筆及證書套.(本來個證書套係唔需要,但都唔知點解我又好想買,所以又買埋)

而且,我同肥老闆各人都豪左1次.

佢去租左架mini cooper開篷車2日,用黎當日自己駕駛做花車喎.
佢話咁先夠型....又話咁就唔駛驚花車用多左時間要俾錢.
仲要自己結婚前一日整多d decoration....加乜野汽球、拖汽水罐咁樣喎......
(氫汽球邊恕有呢????)
仲話可以第二日回門都佳住返去夠型仔.
俾佢激死

不過佢鍾意,算數啦!!

酒店明明送架benz e320 3小時架嘛...佢唔鍾意架車係深藍色......
其實我喜歡架benz多d....夠大夠舒服...著件長長拖尾婚紗都好鬆動.
依家都唔知點...用定唔用好???


跟住,到我豪返1次
就係去左芝柏數碼港到買左個中國愛情故事package，個sales認得我,(我之前去過芝柏同細佬揀婚紗相，當時佢已經勁游說我影中國look,佢話我會襯果d景),加送一件婚紗俾我出海邊石灘同公園影,仲要快馬加急咁速影速拎相......
務求令婚期前可以自己出外造好相簿.

咁.......我就乖乖咁俾錢........

我恨左好耐的china look呀~~~~我恨左好耐的數碼港呀~~~~~我恨左好耐的海景婚紗相呀~~~~~我恨左好耐的果頂轎呀~~~~~

估唔到仲有得係婚期影婚紗相喎...哈!!

肥老闆﹕你係無左我唔得既!!(好嬲定好笑????)

尋日為左個rundown鬧鬼左肥老闆一餐。
事緣係﹕

尋日揀左註冊時間，叫佢得閒要諗下結婚當日程序，
佢就答話﹕咁你幾時約晒d兄弟姐妹出黎，大家一齊諗。

我真係好鬼嬲，又係咁!!!!叫佢做乜，佢就assign俾人做。佢估佢真係老闆咩????間中追問我，做乜未做物未，到我叫佢，佢就話搵左呢個果個架勒，得啦，佢地會攪。
我心諗，d兄弟又唔係幫你打工，人地義務幫手咋嘛，你又唔夠錢請個專業婚禮統籌，就算人地拍左心口話得，你都要自己跟下架?何況結婚咁大件事，個rundown無理由叫人諗架嘛......人地最多咪俾下意見架咋......於是我罵左佢一餐。

佢後來解釋話佢意思係叫人俾意見，但係，一叫佢諗rundown佢就話搵兄弟姐妹，咁即係乜意思丫!! 佢仲係咁解釋，我覺得佢盞浪費我時間，費事睬佢。

結果佢屈服左，好委屈如小媳婦般咁話我知佢諗左個rundown出黎。今日我一睇，原來係下面咁既﹕

7:00-8:00----leave男家
9:00-10:00--出門
11:00-----------入門
12:00----------影相(男家)
1:00-2:00----lunch
2:00-3:00----影相(香港公園)
4:00------------紅棉路註冊

原來佢就係諗左呢個咁偉大的rundown而要求兄弟姐妹俾意見!!!!!!
好精彩!!!呢個rundown簡直世紀空前偉大!!!!!!!簡約中包含最重要元素!!!!!缺一不可!!!!!

今朝我見到呢個咁偉大的rundown，我都唔知好嬲定好笑。

係佢諗上述呢個咁世紀空前偉大的rundown之前仲話，咁你個化妝師幾點黎好呀??我答佢，咁有rundown我咪叫佢接新娘前2小時到咪得囉.!!!我識加上去架啦!!!

剛才我打電話，取笑佢個rundown ,佢仲話﹕我呢個係骨幹黎架嘛!!!!

骨幹???!!!!!我駛鬼佢諗咩????一早都預計知啦!!!!仲死撐!!!!!
把幾火，自己一早起身埋首諗左2個rundown出黎好過!!!!!

唉，我今日都無氣話佢，只係同佢講﹕

"呢個咁偉大的世紀rundown證明左一樣野，

你係無左我唔得既!!!!!!"
唔係下化?????呢個咁既傻恅，就會係同我一生一世的人......
後記﹕究竟係我太叻???定係佢......
又或者，佢聰明過人，咁樣激下我，最多俾我鬧一餐，但以後會令我怕鬼左佢，少d野要佢理!!!佢可以慳返!!!!!蹺埋手等做新郎哥!!!!!!佢精人出口，我笨人咪出手囉!!!!!!奸計???得左!!!!!

諗起都......差d想講粗口!!!!!

構思中的結婚當日程序表

大日子﹕6月18日(星期日兼父親節)

男家入門﹕佐敦、女家出門﹕粉嶺、酒店﹕金鐘、註冊處﹕紅棉路

暫定程序表1(翌日回門)﹕

6:00化妝師到女家
6:00-7:30新娘著褂、化妝、set頭(化妝師)
7:00伴娘到女家
7:30其他姐妹到達女家集合
7:30-8:00伴娘及外母化妝set 頭(化妝師)

6:15集合時間---花車、伴郎兄弟、3名攝影攝錄師準時到達男家
6:30-7:00佈置酒店花車(請攝影攝錄師拍花絮)
7:00花車由男家出發(請攝影攝錄師拍花絮)
8:00花車到達女家(先請1名攝影師上女家拍花絮---新娘準備的情況)
8:05-9:00玩遊戲、開門利是、接新娘(因應到女家的長輩而調節時間)
9:00-9:25新人敬茶、拍照(因應到女家的長輩而調節時間)
9:30(吉時出門)花車出發到男家入門
10:30(吉時入門)到男家入門
10:30酒店花車可退回
10:30-11:00入門儀式及拍照
11:00-11:30換婚紗補妝(姐妹協助???)
11:30-12:30到會所及平台花園影相
12:30-2:00午膳時間(在哪裡吃????)
下午帶備所有新郎新娘靚靚衣服到金鐘酒店check-in(時間未confirmed)
2:00-2:30化妝師替新娘換妝、換髮型(地點﹕男家???酒店???紅棉道????)
2:45攝影師替新人在香港公園拍外影(影埋晚裝???)
3:15-3:30所有工作人員、證婚人、親友到達註冊處及拍照
3:45到註冊處準備註冊(新郎未簽登記文件)
4:00註冊開始
4:15完成註冊
4:15工作人員到酒店準備
4:15-4:30與其他親友補拍照片
4:45新人到達酒店準備晚宴


暫定程序表2(即日回門)


6:00化妝師到女家
6:00-7:30新娘著褂、化妝、set頭(化妝師)
7:00伴娘到女家
7:30其他姐妹到達女家集合
7:30-8:00伴娘及外母化妝set 頭(化妝師)

6:15集合時間---花車、伴郎兄弟、3名攝影攝錄師準時到達男家
6:30-7:00佈置酒店花車(請攝影攝錄師拍花絮)
7:00花車由男家出發(請攝影攝錄師拍花絮)
8:00花車到達女家(先請1名攝影師上女家拍花絮---新娘準備的情況)
8:05-9:00玩遊戲、開門利是、接新娘(因應到女家的長輩而調節時間)
9:00-9:25新人敬茶、拍照(因應到女家的長輩而調節時間)
9:30(吉時出門)花車出發到男家入門
10:30(吉時入門)到男家入門
10:30酒店花車可退回
10:30-11:00入門儀式及拍照
11:00-11:30換婚紗補妝(姐妹協助???)
11:30-12:00到會所及平台花園影相
12:00-1:00花車出發到女家
1:00-1:15回門及回門禮儀(燒豬、生果、餅食、糖果)
1:00-2:00女家親友、兄弟姐妹、工作人員在女家酒樓午膳
2:00-3:15花車出發由女家直接到註冊處
3:15-3:45化妝師替新娘換妝、換髮型
3:45-4:00所有工作人員、證婚人、親友到達註冊處及拍照
3:45到註冊處準備註冊(新郎未簽登記文件)
4:00註冊開始
4:15完成註冊
4:15-4:30與其他親友補拍照片
4:30-5:00攝影師替新人在香港公園拍外影
4:45工作人員到酒店準備、帶備所有新郎新娘靚靚衣服到金鐘酒店check-in
5:15新人到達酒店準備晚宴

今天去選註冊時間

我今天獨個兒到婚姻辦事處，選擇結婚當日的註冊時間。

名義上是選擇，事實上卻是選無可選，我的選擇是，有下午註冊時間就可以了。

一去到，除了大陸狀的內地女人說取離婚證明書來宣誓、單頭的男人娶大陸女人之外，年青的，全都是一對對而來------除了我。.

時間本是10:30，我已經10點到地鐵站，但給錯誤的路標指引，走錯了路，大約10:10，到達辦事處。

那時候，原來已經處理21號籌了。

取了表格填，靠執筆吃飯的我，寫字本應難不到我，但那支筆卻像铅一樣重。

我寫的字，歪歪斜斜的，從沒有這樣醜陋過。

填好了，等叫籌號，等了好一會，才到我交表格。我一個人走到那個窗......

交表格時，手還有點顫。

職員問我，揀乜時間。一看上午11:00直至下午3:45全部填滿了。

那就4:00pm吧......

其實，已經很好了。初時想，4:30也可以的...只要是下午便好了。

揀好，交錢作擬結婚通知書的費用。又行開等。

之後再叫名，都是只叫男人的名字...我卻一個女兒家走上去。

核對資料，簽名證明資料無訛。男方也要簽，今天不來，到結婚那一天吧。

之後又再出去等宣誓。

叫名,又是叫男的。我走上前去。看過資料沒有?看過。所有都正確嗎?正確。

宣誓吧!!

我.........

讀得斷斷續續的宣誓.......

我今天也這個樣子，註冊當天會怎麼樣???

今天，很想哭﹗

好在,我揀時仲有下午註冊時間...後d都好過無啦......
鬆返一口氣,無咁大壓力.
唔係的話,好似因為我唔轉去大會堂而唔能夠下午註冊咁,責任好大......

明天去揀時間

心情好緊張，內心有點不安......

今晚食乜餸之籌備篇

今晚食乜餸之籌備篇

由於，3個月後即將成為真正師奶，為了縛住未來夫婿的胃(這位仁兄的口味特別麻煩)，從而達到縛住他的心，只好開始學做煮飯婆。

我不懂煮飯麼﹖非也。小妹自小學6年級起，已經肩負買餸煮飯的責任，直至21歲步入惡人谷為止，凡十年也﹔基本中下家庭的飯菜，弄出來根本不難。但自從步入惡人谷至今，亦十年也﹔無論如何也需日子重拾故技。

只可惜，肥老闆自小吃的是鬼佬工人煮的食物，用料、烹調手法奇怪，既中既西、不中不西，年月既久，加上家教極好，敢於發現人家小錯，並積極熱心地直接發表意見，令他成為一名食評家的日子不遠。

為了適應未來夫婿的品味，只好學習煮這種不中不西的晚餐。

經肥老闆修訂後，學習更改菜單如下﹕

例子1﹕青紅蘿蔔煲豬骨/豬腱湯----肥氏要求改為牛腱

做法﹕簡單---先猛火煲水，放入已洗淨之果皮、蜜棗，同時開始把青紅蘿蔔削皮、切塊，洗淨牛腱，水滾按次放入煲內，大滾半小時，後因應水量及湯濃度調校火。約2小時完成。

例子2﹕放湯通心粉----肥氏要求改為白汁吞拿魚焗通心粉----為免肥氏成日食肉唔食菜遲下仲肥如麥兜，我再修改為----白汁吞拿魚西蘭花甘筍粟米焗通粉

做法﹕一般---先煲水煮熟通心粉，掠乾待用，洗淨甘筍及西蘭花、粟米，煮熟待用，用奶、白汁粉、水煮好白汁，把所有材料放入錫紙盆內，焗好。

另自訂菜單如下﹕

1/白汁薯仔雞翼

2/香煎牛排配金菇椰菜

記住咁多先......